Kataitai Ao Kanganga (#10447)

Am bwai te mimitong; Atuau!  Ma ngke akea karawawata ake a uotaki ni Kawaim, ao e na kangaa iai ni kinaaki ake a Tangiraki ni koaua; ao ngke tao tiaki man taian kataitai ake a tabekaki i bukin Tangiram, ao e na kanga riki ni kaotaki iai ngkanne rineia ake a Mateakiniko? Korakoram bon au tia kakoaua!  Raoiroia ake a Maamateakiniko ni kabane bon te rannimata ake a kawaanakoi, ao raun nanoia ake a Ukoukoriko bon korakain nanoia naake a ngirangiraia, ao kanaia naake a kaaraki ni kan kaaitibo ma Ngkoe bon taribin nanoia aika a uruaki.
Ai kangkangira irou katoongan maon te mate ae e taonai i nanon Kawaim, ao ai bonganara n au katautau aia kainiwai Am kariribai ngkana kaaitaraai i bukin karietataakin Am Taeka!  Katauai Atuau bwa Nna nima te baere Ko a tia ni matennanoia i nanon Am Waaki ao karuoa i aou rinanon Am tangira bwaai ni kabane ake Ko a tia ni motiki taekaia.  Ni Mimitongim! I tii tangira are Ko tangiria, ao I nabenabea are Ko nabenabeia.  I a tia n taai nako ni katuka au mwioko ae e bwanin ao au onimaki Iroum.
Kateirakeaa, I Bubutiiko Atuau, bwa taan buoka te Kaotioti aio naake a na warekaki bwa a tau i bukin Aram ao Inaomatam n tautaeka, bwa a aonga n uringai i buakoia ake Ko a tia ni karikiia, ao a na irakei manuan Am tokanikai i Abam.
Ko konabwai ni karaoa are e Kakukureiko. Akea Te Atua bwa ti Ngkoe, te Buoka n te Nibwa ni mate, te Maiu i bon Irouna.

-Bahá'u'lláh
-----------------------

Kataitai Ao Kanganga (#16155)

Kabuaa nanokaawakiu n Am akoi ao Am tituaraoi, O te Atuau, Atuau, ao kanakoa rawawatau rinanon Inaomatam n Tautaeka ao Mwaakam. Ko norai, O Atuau, ma moau ae e kaineti Nakoim n te tai ngke taian nanokaawaki a otabwaninia man itera nako. I bubuti Nakoim, O Ngkoe are Ko Uea iaon te maiu nikabane, ao ni kanuui bwaai nikabane ake a noraki ao a aki noraki, n Aram ike Ko a tia ni kabebetei nanoia ao tamneia aomata, ao man utin Marawan Am nanoanga ao tikauan Itoiningainan Am akoi, ni warekai ma naake akea te bwai teuana ae e a tia n tukia man kainetakin moaia Nakoim, O Ngkoe Uean aara nikabane ao te Tia Kariki taian karawa!
Ko norii, O au Uea, bwaa ake a tia ni bwakarai inanon Am bong. I bubuti Nakoim, iroun Teuare Ngaia Bonginaumarin Aram nako ao Nnen-Inginimainikun Anuam nako, ni kataua ibukiu te bwai are e na karikai ni kona n teirake ni beku Ibukim ao ni kamoamoai Anuam nako. Ngkoe, ni koaua, te Kabanea ni Korakora, te Kabanea ni Mwaaka, are te Tia Kaekai aia tataro aomata nako!
Ao, ni kabaneana, I bubuti Nakoim n otan Moam ni kakabwaiai au waaki nako, ao ni kaitiaki au taarau, ao ni kaekai kainnanou nako. Ngkoe Teuare are nakon Mwaakam nakon Am Tautaeka nikabane neewe a kakoaua nako iai, ao nakon Kakannatom ni Uea ao nakon Inaomatam n Tautaeka nikabane naano ake a mataata a tia n ataia. Akea riki te Atua ma bon ti Ngkoe, are Ko ongo ao Ko tauraoi ni kaeka.

-Bahá'u'lláh
-----------------------

Kataitai Ao Kanganga (#16156)

O Ngkoe are Am kataitai bon te bwai ni katoki aoraki nakoia naake a kaan Nakoim, are Am kabaeng bon ingaingan nanoia ae a tangiria nikabane ake a Tangiriko, are Am kainiwai bon matennanoia naake nanoia a ingainga naake a Mateakiniko, are Am tua bon oin aia kantaninga naake a tia ni kinaa Am koaua! I bubuti Nakoim, ni karewerewe Tamneim ao n tikauan mimitongin Moam, ni karuoa nako aora man taabo ake i eta te bwai are e na kona ni karikiira ni kaaniaki Nakoim. Kataua, ngkanne, ni kamatoai waera, O te Atua, inanon Am Waaki, ao kaotai nanora ma raneanean otan Am atatai, ao kaotai bwanibwannra ma raitiitin Aram.

-Bahá'u'lláh
-----------------------

Kataitai Ao Kanganga (#16157)

Ko kamimitongaaki Ngkoe, O te Uea Atuau! Nikabane aomata n taratarannano a kakoauaa Inaomatam ni uea ao Am Tautaeka, ao nikabane maata aika a noraba a nora korakoran Kakannatom ao te mwaaka ae e aki kona ni kaitaraaki ni Korakoram. Angin taian kataitai akea korakoraia ni katokiia naake a kukurei ni kaan Nakoim man kainetakin moaia nakon oraitanin Am mimitong, ao angibuakan taian karawawata a na kabwaka ni katikaanako ao ni katokiia naake a tabwanin aia babanennano nakon Nanom man kaanian Am oo.
N au iango, tauran Am tangira e kauraaki inanoia, ao otan Am akoi e ura inanon bwanibwaniia. Taian kabuanibwai akea aia kona ni kamaenakoia  man Am Waaki, ao taian reimaurua n te kaubwai a bon aki kona naba teutana ni karikiia n touaanako man kukurein Nanom.
I bubuti Nakoim, O Atuau, irouia ao n ikenrawaia are e katinakoa nanoia n raurenakoia mai Iroum, ni kawakiniia man aia kakiriwe Am kairiribai, ao ni kamarikea tamneia ma te bwai are Ko a tia ni baireia ibukiia naake Ko tangiriia are nakoia e na aki roko te maaku ao a na aki kananokaawakaki.
Bahá’u’lláh

-Bahá'u'lláh
-----------------------

Kataitai Ao Kanganga (#16154)

O te Uea! Ngkoe te Tia Kamwaawai nako karawata nikabane ao te Tia Kamaunai bwaai nako ake boton te karawawata. Ngkoe are Ko kanakoi nikabane nanokaawaki ao ni kainaomataia nikabane kaaunga, te Tia Kamaiuia tamnei nako. O te Uea! Kariaia kabwaraakiu rinanon Am nanoanga, ao warekai ibuakoia Am toro ake a tia ni karekea te kamaiuaki.

-The Báb
-----------------------

Kataitai Ao Kanganga (#10448)

Ti Te Atua ke iai ae E konaa ni kanakoi kangaanga?   Atongnga: E na neboaki Te Atua.  Bon Te Atua Ngaia, ao aomata ni kabane bon Ana toro ake a bane n ira nanon Ana taeka.

-The Báb
-----------------------

Kataitai Ao Kanganga (#10449)

Ko ataia ni koaua, Ngkoe Atuau, bwa a bon tia ni bwakarai taian kangaanga man itera nako, ao bon akea ae e kona ni kamaunai ke ni bitii ma bon ti Ngkoe. I ataia ni koaua, bwa ni koauan Tangiram irou, bwa Ko aki kona ni karika te kangaanga bwa e na bwakara te tamnei temanna ma ti ngkana Ko tangiria ni karietaata nnena inanon Am Baretaiti are i eta ma ni kanonoa nanona inanon te maiu i aon te aba aio n nonon Mwaakam ae rotii bwai nako, bwa e na aki katan nakon bwain te aonaaba aei ae akea nanoia. Ko bon ataia ni koaua i aan aroaro nako bwa I nabea riki Ururingam nakon bwainakin ni kabane ake n taian karawa ao i aon te aba. 
Kamatoa nanou, Ngkoe Atuau, n Am boraraoi ao n Am tangira, ao kariaia bwa I aonga ni mwaawa ni botakiia ni kabane ake a Kaitarako. Ni koaua, I kaotia ni Mimitongim bwa akea ae I tangiria i Rarikim, ke iai riki te bwai ae I kainnanoia ma ti Am nanoanga, ke n ingainga nakon te bwai teuana ma ti Am motiraoi. I a Butiiko bwa Ko na kabwarai au bure, ao aia bure naba naake Ko tangiria, n aron are Ko nano iai. Ni koaua, boni Ngkoe Moan te Mwaaka, te Atataiaomata.
Ko bon rangi ni karietataaki riki Ngkoe, ae Uea ni karawa ma aon te aba, i aon aia nebonebo aomata nako, ao e na mena te raoi i aoia nako Am toro aika a kakaonimaki ao Ko kamimitongaki Ngkoe Te Atua, ae Uean aonaaba ni kabane.

-The Báb
-----------------------

Kataitai Ao Kanganga (#16158)

O au Uea! I a tia ni katikaki ni kaaniaki Nakoim, inanon kabin rotongitongin te tairiki aio, ni kaotii bwaai Nakoim ma newen nanou, n rurubenebene ma te kukurei ni karewerewen taian boiarara ake a ukaki man Am abanuea, te Kabanea ni Mimitong, ni wewete Nakoim, ni kangai:
O au Uea, akea te taeka ae I kona ni kunea ibukin Kamimitongaakim; akea te kawai ae I noria ibukin mannikiban au iango bwa e na kibarakeia nakon Am Abanuea ae e Katabuaki; bwa Ngkoe, n oioina ni koaua, Ko bon katabuaki ietan riki kamoamoaaki aikai, ao n Oioin Maium Ko mena i tinanikun riki are akea Rotakim n taian nebonebo ake angarakeaki Nakoim mai irouia aomata ake Ko a tia ni karikiia. Inanon tabun oin Maium Ko a kaman karietataaki riki iaon mataataia naake a rabakau ibuakoia kaain te Runga are i eta, ao n teimatoa n aki toki n tiku n rabunaki inanoaan katabun oioin Rikiam ni koaua, n aki rotaki n aia atatai naake a maeka inanon Am abanuea ae e karietaaki ake a kamimitongaa Aram.
O te Atua, Atuau! Nna kanga ni Kamimitongko ke ni Kabwarabwarako e ngae ngke akea ae e kona n roko Iroum; e aki kona ni uakoraaki aron Rietaatam ao Tabum iaon riki taian kabwarabwara ao nebonebo.
O te Atua, Atuau! Nanoangaea arou ae e aki konabwai, kainnanou, nanokawakiu, bwainikirinakiu! Anganai bwa nna moi man te mwangko n tituaraoi man Am karaoiroi ao Am kabwarabure, kamwaingai ma karewen boiararan Am tangira, kakukureia bwanibwaniu ma otan Am atatai, kaitiaka tamneiu ma miterion Am katiteuana, kateirakeai bwa nna maiu ma aabebeten te ang are e roko man onarokan Am nanoanga – ni karokoa ae I koreai man bwaai nako ma ti Ngkoe, ao n tinea rabin Am kamwarai ae e kakannato, ao n anganako nakon te aakea bwai nikabane ake tiaki mai Iroum, ao n raonaki ni karewerewen taian ikeike ake a ukuukaki inanon aikai ake Am bong, ao ni karekea rokou nakon te kakaonimaki n Atibunmataroan te Katabuaki, ao n teirake ni beku ibukin Am Waaki, ao n riki ni kamangoraki i mataias naake Ko tangiriia, ao, ibuakoia naake Ko nano irouia, n riki bwa oioin te aakea ni koaua. 
Ni koaua Ngkoe te Tia Ibuobuoki, te Tia Kateimatoa, te Karietaaki, te Kabanea n Tituaraoi.
O te Atua, Atuau! I bubuti Nakoim n inginimainikun otan Tamaroam are e a tia ni kaotaa aon te aonnaba, ao ni waekoan taraakina n te mata n tamnei n nanoanga are e karau n iangoi bwaai nako, ao n naorebun taari n Am bwaintituaraoi are a bane bwaai n iinako inanona, ao man Am nang n akoi aika a beibeti ake a kabwakai karaun taian bwaintangira nako aon oioia karikibwai nikabane, ao n tikauan Am nanoanga ae kaman iai imwain kaotin te aonnaba – ni buokiia naake Ko rineia bwa a na kakaonimaki, ao ni buokiia naake Ko tangiriia bwa a na beku n Atibun te Mataroa ae e karietaaki, ao ni karikiia bwa a na karekea te tokanikai rinanon taian tanga n tautia ni Korakoram are e korakora iaon bwaai nako, ao ni kamatoaia ma taan untaba ae e korakora mai inanon te Runga are i eta. 
O au Uea! Ngaiia bon tamnei aika a mamaara ake a teitei i matan Am mataroa; ngaia bon taian kainnano inanon Am oo, n ririkanaa Am karaoiroi, ni kaakaiaki ni kainnanoa Am ibuobuoki, n raira moaia nakon te abanuea  ibukin Am katiteuana, n ingainga nanoia ibukin taian bwaintituaraoi n Am bwaintangira. O au Uea! Kaiabutii aia iango ma Otam ae e tabu; kaitiakii nanoia ma karaoiroin Am ibuobuoki; kakukurei bwanibwaniia ma boiararan taian kakukurei ake a wai man Am Runga are i eta; kariki mataia bwa a na takiakia n nori taian kanikinaa ao kauring ibukin Korakoram; karikiia bwa kanikinaean te itiaki, taian baena ibukin te katabuaki ake a tiotio n rietaata i etaia karikibwai nako iaon taubukin te aonnaba; kariki aia taeka bwa a na ringi naano ake ai aron taian bwaa aika a matoaninging. A bia teirake ni beku Ibukim ao ni kabureia nakon Abanuean Am tamnei, ao ni kaetii moaia nakon aonnaban Am Kataubobonga, ao n tibwatibwai nako kiraroa ao n raababanako Am kanikinaa, ao ni kaotaaki n Am ota aika a waanako, ao n takinaanako Am miterio aika a karabaaki. A bia kairiia Am toro nakon raan aika a aabebete ao nakon te bwaronran n Am nanoanga are e koburake ao n naorebua inanon nukan buroon Karawan Am kateuana. A bia irakea i eta ien te kamwawaaki iaon te Aake ni Kamaiuaki, ao ni mwaing riaon taarin Am atatai; a bia tibwatibwai ni kataorababa nako bainikiban te katiteuanaaki ao man aia ibuobuoki ni kibarake nakon te Abanuea ibukin Am katiteuana n riki bwa tooro ake te Katoki n Rietaata n Runga e na uboiia, are aia kamoamoa taan maeka n Am kabanea ni mimitong n aonnaba a na tabotaboia; a bia ongo taian wewete man te aonnaba are e aki nonoraki ngke a mwemweka tangiia ibukin te Kabanea ni Korakora ni Kakukurei n Rongorongo; a bia ngaiia, inanon ingaingan nanoia ni kan kaitibo ma Ngkoe, ni bubuti ao n tataro Nakoim, ni katakei taian tataro n inginimainikun te ota – O au Uea Ngaia are e karenakoi bwaai nako – ni katimwa rannimataia n te ingabong ao n te tairiki, n ingainga ni kan ribuakon nuun Am nanoanga ae akea tokina.
Buokia, O au Uea, iaan itera nako, boutokaia n taainako ma Am anera aika a katabuaki, ngaiia ake kaain Am runga aika a aki nonoraki, Am taanga n tautia ni karawa ake a uotiiarikaaki nakon te taenikai taian taanga ni buka aika a taotira n te aonnaba ae e kai toki aio.
Ni koaua Ngkoe te Kabanea ni Kakannato, te Kabanea ni Mwaaka, te Korakora, te Rabwati Bwaai Nako, Temanna are e tautaeka iaon bwaai nikabane ake iai.
O te Uea ae e tabu! O Uean te tangira n akoi! Ti aiwaa nako n Am tabo ni maeka, n ingainga ni kan nora Tamaroam, ao n tangirii Arom nako. Ti aki konabwai, ti rinano, ao akea arora. Ti kainnano: kaota te nanoanga nakoira, anganiira te bwaintituaraoi; tai tarai ara kabwaka, karabai ara bure aika akea tokin mwaitiia. E ngae ngke tera ngaira, ma ngaira bon Am bwai, ao te bwai are ti taekinna ao n ongo bon Neboam, ao bon Moam are ti ukoukoria, Am kawai are ti toua. Ngkoe Uean te tangira n akoi, ngaira taan bure ao ti aiwaa nako ao raroanako man mwengara.
Ai ngaia are, O Nangin te Nanoanga, kariai teutana timtimin te karau. O Beeran Ueen te karaoiroi, kanakomaia te ang ae e aabebete ae e boiarara. O Taari n taian bwaintangira nikabane, karabinoa nakoira te nao ae moan te korakora. O Taain te Bwaintituaraoi, karuoa rikaaki teaina buraenimatan te ota. Kariaia anganakira te nanoanga, kariaia anganakira te karaoiroi. Rinanon Tamaroam, ti roko n akea ara tianaki ma ti ara bure, n akea ara mwakuri aika a raraoi ake ti na karakinii, ti taian kantaninga. Ti ngkana Am rabunanimata ae e karabai bwaai nako e rabuniira, ao Am kamanomano e otanganiira ao ni bwabwakoira, tera korakoraia tamnei aika a aki konabwai aikai ni kona n teirake ao ni beku Ibukim, tera aroia naaka akea aroia aikai ni kona ni kaota aroia ae e ninikoria? Ngkoe are Ko Korakora, te Kabanea ni Mwaaka, buokira, mwannanoira; ti bon rai n arora, kamaiuira ma te karau man Am nang ni karaoiroi; n arora n rinano, kaotaira ma buraenimata aika a otamwaka man Bonginaumarin Am katiteuana. Ko na teweinako ika aika a takaroro aikai nako nanon marawan Am nanoanga, Ko na kaira te kaeravan ae e bua kawaina aio nakon te tabo ni katantan n Am katiteuana; nakon koburaken ranin te kairiri Ko na kairiia naake a tia n tiotio nako kiraroa, ao kariaia naake a tia ni kitana te kawai te tabo ni kamanomano inanoaan nnen Korakoram. Ko na mwemwekia nakon riia aika a raure aikai ranin karawa aika a onrake n te akoi ao n aabebete wawaaia, kateirakeia maate aikai nakon te maiu ae akea tokina. Ko na kariaia nakon maata aika a matakii bwa a na noraba. Karika te bonokau bwa e na ongo, te kabi n taetae bwa e na taetae. Ko na kaurarakea are e mate tamneina, Ko na karika are e aki mwemweuti bwa e na iangoraoi, Ko na anga te kauring nakoia ake a kamoamoa, ni kautiia naake a matu.
Ngkoe te Korakora, Ngkoe te Tia Angaanga, Ngkoe te Tia Tatangira. Ni koaua Ngkoe te Tia Tituaraoi, te Kabanea n Rietaata.
O ngkami taan tangiraki iroun te Atua, ngkami taan buoka te Toro ae e kaotaaki aio! Ngkana Taain te Koaua e a kamrarai ana akoi aika akea tokin mwaitiia man Nnen Inginimainikun nikabane taian tangiraki nako, ao te aonnaba ni maiu aio e a kaotaaki ma te ota ae e tabu man te bore teuana nakon te bore are teuana, ma te aeka ni korakora are e karuoa otan buraenimatana n te aro are e tuuk roon te Stygian n aki toki, ao ikanne are te aonnaba ni bubuntano aio e a riki bwa mronronin karawa, ao te tabo ae e rinano aio e a riki bwa te tabo ao te panoply ibukin te aonnaba are katokin te rietaata. Aabebeten te ang ae e katabuaki e ukukaki iaona, n tamrurua nako kiraroa karewerewen katomamina; angin te aumari ni karawa e rirarikina, ao e rietana, man Boton nikabane taian bwaintangira, a ukukaki taian eea aika a kariki uaa ake a uotii taian karaoiroi aika akea tiaia. Ngkanne e a waerake te inginimainiku ae e otamwaka, ao a roko rongorongo aika a rangi ni kakukurei. Te aumari n tamnei e a roko ikai, ni katei ana tent inanon te aonnaba ae e kai toki aio, n te aro are karikibwai nikabane a kibarake ao ni mwamwaie. Aonteaba are e rai e a kaotinakoi taian uee aika aki mamate, te bubuntano are e mate e uti nakon te maiu ae akea tokina. Ngkanne a kaoti taian uee man te reiakinaki are e miterio, ao, n tabotaboa ataakin te Atua, te mawaawa ae e boou mai aontano. Te aonnaba ae e kai totoki e kaoti ana bwaintangira te Atua aika a tituaraoi, te aonnaba are e kona n noraki e kaotanako mimitongin taian aonnaba ake a karabaaki man te taratara. Ana wewete te Atua e a katanoataaki, te taibora ibukin te Boraraoi are Akea Tokina e a katauraoaki, te mwangko ibukin te Tetemanti e a kabutaki man te bai teuana nakon teuana, te kakao ae e taorababa e a kanakoaki. Ngkanne tabeman mai ibuakoia aomata a kauraaki ma te wain mai karawa, ao tabeman a katukaki n akea tibwaia man te bwaintangira ae te kabanea ni korakora aio. Aia taratara ao aia taratarannano tabeman a kaotaaki man otan te karaoiroi, ao iai tabeman ake, ngke a ongo kuuna ibukin te katiteuanaaki, a kibarake ma te kukurei. Iai mannikiba ake a moana aia anene inanon onarokan te katabuaki, iai naitingkare inanon mwaangan kain te rooti ni karawa ake a tabekii tangiia n tanginiwenei. Ngkanne a katikiraoaki ao ni katamaroaki ni kauoua te Abanuea are i eta ao te aonnaba are i nano, ao te aonnaba aio e riki bwa bakantangin karawa are i eta. E ngae n anne ai kananoangara, ai kananoangara, taan aki kukuba a tiku ni matuunako inanon matuia n aki kukuba, ao naake a nanobaba a tia n totokoia ma te kairiribai te kabanea n tabu mai ibuakon bwaintangira. Naake a matakii a tiku n niroaaki inanon aia rabunanimata, naake a bonokau akea tibwaia n te bwai ae e a tia n riki aio, naake a mate akea aia kantaninga ibukin karekeana nakoia, bwa n aron are E a tia n taekinna: “A maaku ibukin te maiu ae e na roko, n ai aroia taan bure ake a maaku bwa taan maeka inanon taian ruanimate a na manga moan teirake.”
Ibukimi, O ngkami taan tangiraki iroun te Atua! Kabwarai newemi ao anga Nakoina te karabwarabwa; kam na neboa ao ni kamimitonga Tamaroan Temanna ae Moan te Tangiraki, bwa kam a tia ni moi man te mwangko ae te kabanea n itiaki, ao kam a tia ni kukurei ao ni kauraaki ma te wain aio. Kam a tia ni kunea karewen boiararan te katabuaki, kam a tia n aroka te musk ibukin te onimaki man ana kamwarai Iotebwa. Kam a tia n katonga karewen te anii ibukin te kakaonimaki man bain Teuare Ngaia temanna n ti ngaia ni Kabanea n Tangiraki, kam a tia n amwarake n taian bwainamwarake aika aki kona ni maamate n te baka n amwarake ae e rianako tituaraoina n ana taibora te Uea. Aio ni mwaitikurikuri bon te tibwanga ae e raka are e anganako te Atua ae e tatangira, aikai kakabwaia ao bwaintangira aika a rangi ni burenibwai ake a reke man Ana tituaraoi. Inanon te Gospel E kangai: “Bwa a mwaiti aika a weteaki, ma ti tabeman aika a rineaki.” Are nanona, a mwaiti are e anganaki nakoina, ma e burenibwai te tamnei are e katebenakoaki bwa e na butimwaea te kabanea ni korakora ni bwaintangira ibukin te kairiiri. “Aio aekakin ana bwaintituaraoi te Atua: nakon are E taku E na anganna, ao e rangi ni korakora Ana akoi te Atua.”
O ngkami taan tangiraki iroun te Atua! Mai irouia aomatan te aonnaba, ni kaitaraa Tauranenean te Boraraoi taian ang ni kauntaba a bon kare ao n tauruuru. Naitingkaren te kakaonimaki e taonaki n taan kauntaba ake ai bon aekakin taian mannikiba ravens ni kairiribai. Te Taobe n uringakin te Atua e karawawataaki ni mannikiban te tairiki ake akea kanoan aia iango, ao te Gazelle are e mamaeka inanon tawaanan ana tangira te Atua e ririmwiaki bwa e na tiringaki irouia maan ake a kaakang. E kamaamate te kabuanibwai, ni karawawata te maraki.
Taan tangiraki iroun te Uea a na riai n tei n aki kakamwakuri n ai aron maunga, ni matoa n ai aron taian oo ake a aki kona n uruakaki. N aki mwaingiing a na riai n tiku e ngae ngke te kabanea ni kaakaiaki ni kanganga, n aki kananokaawakaki n te kabanea ni kaakaiaki ni kabuanibwai. Ke a kanim baia nakon rabin te Atua te Kabanea ni Korakora, ao ni katuka aia onimaki inanon te Tamaroa are te Kabanea n Rietaata; ke a rara nakon te ibuobuoki ae akea kabwakana are e roko man te Abanuea are Mangkoangkoa, ao ni katan iaon te tararua ao te kamanomano mai iroun te Uea ae te kabanea n tituaraoi. A na riai n tainako ni kabouiia ao ni moan karin angiia ma aoin te karangaina man te tituaraoi ni karawa, ao ma ikeiken te Tamnei ae e Tabu ni moan kamaiuia ao ni manga kabouiia man te tai teuana nakon te tai teuana. Ke a teirake ni beku ibukin aia Uea, ao ni karaoi bwaai nikabane inanon korakoraia n tibwatibwai nako Ikeikena ae e tabu nakon taabo aika a raroa ao n raababanako. Ke a riki bwa te nono ae e korakora ibukin kamanoan Ana Aro, te tabo ni katantan ae e aki kona n niniaki ibukiia kaain ana runga te Tamaroa are Mangkoangkoa. Ke a kakaonimaki ni kamanoa kateitein Ana Waaki te Atua man itera nako; ke a riki bwa itoi aika a katekemata inanon Ana karawa ae e otanako. Bwa kaain te rootongitong a tabe ni kauntabaa te Waaki aio man itera nako, ao aomatan te aonnaba a tangiria ni kan tiringa te Ota ae e kona n noraki aio. Ao ngkai nikabane kaain te aonnaba a tabe ni katauraoi nakon aia buaka, e na kanga ara taratara ni kamaenakoaki, e ngae ngke ti inanon teutana te tai? Kakoauaa bwa kam atai raoi bwaai aikai, kamatairiki ngkami, ao kamanoa ana Waaki te Atua.
Te kabanea ni kakawaki n tabe, n te bong aei, bon kaitiakan aroaromi, ni kaeti anuami, ao ni katamaroai kateimi. Naake a tangiraki iroun te Nanoanga a na riai ni kaoti aekan aroaro ao katei ibuakoia Ana karikibwai nako, n te aro are boiararan aia katabuaki e na kona ni mrara nako aon te aonnaba ae e bwanin, ao ni kona ni kamaiua te mate, n ai aron ae oin bukin ana Tia Kaotioti te Atua ao inginimainikun taian taura aika akea tiaia man te Aki Nonoraki bon reiakinaia tamneia aomata, ao ni katamaroai aroaroia aomata nikabane aika a maiu -bwa a aonga naake a kakabwaiaaki, ni kainaomataia man bokabokan te aonnaba ni man, a na teirake ma anua akanne are bon katamaroaan oioin te aomata. Oin bukina bwa kaain te aonnaba a na riai ni bitaki nakon aomatan Karawa, ao naake a nakonako n te roo a na riai n roko nakon te ota, ao naake a tinanikuaki a na riai ni kaaina te mronron are mai nuuka n te Abanuea, ao naake bon akea aroia a na riki bwa kaain te Mimitong are akea tokina. Bwa naake akea tibwaia a na karekea tibwaia man taari ae akea tiana, ao naake a nanoroo a na moi ni kanuaia man te koburake n atatai ae e maiu; bwa naake a takaroroa te raraa a na kitani aroia n tiritiri, ao naake a kateketeke aoia n ukin te man a na riai n onikaki nakon te akoi ao te taotaonannano, ao naake a tangira te buaka a na riai ni ukoukora te iooki ni koaua; bwa naake taan iowawa, ukiia ni mannikiba aika a kakang n aron te mwariro, a na riai ni kukurei ni uaan te raoi ae akea tokina; bwa naake a maungitoto a na riai n reireiniia bwa iai te aonnaba n itiaki, ao naake a kamemeaaki a kunea kawaia nakon karaangan te katabuaki.
Ni karokoa te tai are taian bwaintangira ni karawa a kaotaki mai inanoaan nanoia te botannaomata, te bwaintituaraoi are iroun te Tia Kaotioti e na kakoauaaki bwa akea uaana, ao buraenimatan Taain te Koaua ae e katekemata e na bon akea mwina naba teutana.
Ai ngaia are, O taan tangiraki iroun te Uea, kekeiakimwaaka ma nanom ao tamneim ni karekea te tibwa man Ana anua aika a tabu ao anaa tibwam man taian bwaintituaraoi n Ana katabuaki – bwa kam aonga n riki bwa kanikinaean te katiteuanaaki, taian karinan ibukin te kateuana, ao n ukoukora nanon te kateuanaaki; bwa kam aonga ni kona, inanon ana onaroka te Atua aio, ni mwemweka bwanaami ao n anenei kunan te tamnei aika a kakukurei. Riiki n ai aroia mannikiba ake a Anganna aia karabwarabwa, ao iaan nuunikain te maiu katakei ngkami aeka ni kuuna ake a na kaotai aia iango naake a ataia. Tabekaarake te baena iaon taubukin te aonnaba are te kabanea n rietaata, te buraeki ibukin Ana tituaraoi te Atua bwa e na ubaranako ao n tiotio inanon angin Ana tituaraoi; unika ngkami te aroka inanon maraen te maiu, ibuakon taian rooti n te aonnaba ae e noraki aio, bwa e aonga n anga uaana aika a booureirei ao ni karewerewe.
I tuea iroun te Tia Reirei ni koaua bwa ngkana kam karaoa are e kaineti ma Ana kaetieti te Atua, n aron are e kaotaki inanon Ana Tabureti aika a kaotaaki, te bubuntano ae e karooaki aio e na kaotaanako te Abanuea ni karawa, ao te aonnaba ae e kai toki aio aonnaba te Kabanea ni Mimitong.
O ngkami taan tangiraki iroun te Uea! Te nebonebo Nakoina, te aki noraki, taian tituaraoi aika a bwaronako man Taain te Koaua a na otabwanini ngkami man itera nako, ao man taabo nako mataroan Ana nanoanga e tei n uki teutana. Ngkai te tai ibukin rawean te angaraoi n taian kakabwaia aikai, ao ni karekea uaana mai iai. Ataa kakawakin te tai aio, tai kariaia te angaraoi aio bwa e na birinako mai iroum. Tiku ngkoe n rangin teretere raoi ibukin tabeaiangan te aonnaba ae e rotongitong aio, ao riki ni kinaaki man taian anua man oioi akanne ake a karika mwengaia inanon te Abanuea. Ngkanne kam na nora aron korakoran te mimitong man Itoiningainan karawa, ao aron kamatakian otamwaakan taian kanikinaa ake a roko man te aonnaba are e aki nonoraki.

-`Abdu'l-Bahá
-----------------------

